Vo de Biberister Fasnächtler hani bereits Abschied gnoh
Ou dr Elektrofachmaa Hans Niederhauser tue ig verloh.
Zum Abschied gitt’s es Kilo Kupferkabu, dass ig ihn nit vergäss
Das heig drum wesentlich meh wärt als e Aktie vor UBS.

Doch mi Freud isch jetz riesegross, ig bi ganz perplex
Mys neu Revier isch bim Herbergsvater Miescher Alex
Es schöns Huus ar Chürzischtross tuet mi erwarte
Grad näbedra, das isch e Hit, isch em Jost Otti sy Garte!

Nach Dürüm, Kebab, Fastfood und dene lange Fescht,
Isch Fitness gfrogt, mi Figur isch drum nümme die bescht!
Doch spötestens i zwee Wuche chann ig mi wieder chrümme,
Wenn ig zäme mit em Alex fliessig um d’Wett tue schwümme.

Dr Diräktor vom Schwümmverband hett dr Alex a Nagu ghänkt,
Är bruchi drum Zyt für d’Fasnacht, so wyt hett är scho dänkt.
E Schnitzubank z’singe tuet em Herbergsvater kei Kummer bereite,
Dr Affolter Dänu do äne, tuet ne de scho uf dr Handorgele begleite.

S’isch ungloublich, Dir syt mir sicher aui niedisch, ig möcht wette,
Ig cha mit em Herbergsvater eifach so als Copilot ir Luft ume jete.
Mir flüge mit Überschau über d’Ruine vom abebrönnte St. Urs,
Göh rasant i d’Höchi, wärde aber nie so teuf falle wie dr UBS-Aktiekurs.

Politisch engagiert sich dr Alex im Biberister Gmeindrot für d’FDP,
So wird är sicher die gääle Salatblettli für mi, i Ottis Garte gseh.
Kulinarisch bini bescheide, schtöue keini grossi Asprüch as Ässe,
Dr Heri Buur, dr Rolf, söu eifach für nes Johr s’bschütte vergässe.

Ig goh natürlich ou öppe mit em Sibylle und de Ching go poschte,
Wenn d’Yara, dr Sämi und ig iechoufe, wird’s haut öppis choschte.
Alex, mir zwee si es Team und hebe d'Ohre stief und d'Ouge offe,
Verzöue s'nöchscht Johr ir Bütt, was z’Biberist so isch gloffe!

Anno Domini, Biberist, 25. Horner 2009

Die Obernärrin
Susanne Scheidegger

Der Värslibrünzler
Werner Jäggi

Die Narrenschreiberin
Andrea Mühlemann